PE715B - Anotación no rexistro de centros de acuicultura.

Obxecto

O desenvolvemento e a aplicación dos procedementos de control sanitario e do funcionamento dos centros de acuicultura en augas continentais e a regulación do Rexistro de Centros de Acuicultura, en aplicación do establecido nos artigos 61, 62 e 63 do Regulamento de ordenación da pesca fluvial e dos ecosistemas acuáticos continentais (Decreto 130/1997).

Terán a consideración de centros de acuicultura en augas continentais todo tipo de instalacións nas que se manteñan vivas especies que habiten ou poidan habitar nas augas continentais, así como os seus ovos ou gametos, con fins de producción, comercialización ou consumo, e nas que se faga uso das augas continentais tanto mediante captación coma mediante vertido de efluentes líquidos.

A quen vai dirixido?

Centros de acuicultura en augas continentais.

Requisitos

Os titulares ou representantes legais dos centros de acuicultura en augas continentais deberán solicita-la inscrición do centro no rexistro e notificar calquera cambio nos datos que figuren nel.

O Rexistro de Centros de Acuicultura constará materialmente dun libro de rexistro cunha encadernación que garanta a súa integridade e con tódalas follas útiles numeradas correlativamente nun dos seus ángulos. No caso de ser necesario, o libro de rexistro poderá constar de varios tomos numerados por orde de antigüidade.

Na folla de portada do libro figurará unha dilixencia do secretario xeral da Consellería de Medio Ambiente na que conste o número de follas, a numeración destas, o número do tomo e outras características descritivas do libro que garantan a súa integridade. No caso de seren necesarios varios tomos, cada un deles será dilixenciado de igual xeito.

Cada centro de acuicultura en augas continentais abrirá un folio no libro de rexistro e asignaráselle un número de rexistro diferente e correlativo. Todo asento relativo ó centro de acuicultura realizarase nese mesmo folio en liñas sucesivas, sen deixar ocos nin claros, e facendo consta-la data na que se realiza.

No caso de ser necesario, no pé de páxina faranse consta-los números de tomo e de folio no que se continúen os asentos. O folio no que se continúen os asentos encabezarase cunha referencia ós números de tomo e de folio no que foi rexistrado por primeira vez o centro de acuicultura.

Os asentos no libro de rexistro serán de tres clases: inscrición, anotación ou cancelación.

As modificacións de calquera dos datos consignados no libro de rexistro darán lugar á correspondente anotación.

Cando as modificacións non deban ser previamente autorizadas o titular ou representante legal do centro de acuicultura porá en coñecemento todos aqueles cambios que afecten os datos que constan no rexistro.

No caso de modificacións que deban ser autorizadas, as resolucións dictadas darán lugar ás correspondentes anotacións de oficio. Igualmente, anotarase de oficio calquera outra resolución administrativa ou xudicial. Nestes casos de anotación de oficio notificaráselle ó titular ou representante legal do centro de acuicultura a data e o contido da anotación.

O libro deberá manterse permanentemente actualizado, e débense efectuar tódalas anotacións sen demoras inxustificadas. En todo momento as anotacións deberán corresponderse co número e tipos de peixes presentes no centro de acuicultura.

As anotacións deberán efectuarse preferentemente en letras maiúsculas e unicamente con bolígrafo ou rotulador de tinta endeleble. En ningún caso se empregará un lapis ou calquera outro medio que permita o borrado.

No caso dun erro nas anotacións, deberá anularse con dúas raias diagonais a liña correspondente ou, se é o caso, a páxina enteira e comezar unha nova anotación. Prohíbese arrinca-las follas do libro, borra-las anotacións ou sobreescribilas.

O libro deberá conservarse en perfecto estado de uso no interior das instalacións do centro de acuicultura. Só poderá ser retirado das instalacións por persoal da Consellería de Medio Ambiente, debidamente acreditado, o cal deberá entregarlle ó responsable do centro un documento acreditativo da retirada do libro.

No caso concreto de dous ou máis centros de acuicultura que teñan o mesmo titular, cada libro de rexistro deberá estar depositado nas instalacións de cultivo correspondentes e nunca en instalacións ou oficinas comúns a tódolos centros.

Deberase notificar con antelación suficiente ó Servicio Provincial de Medio Ambiente Natural a necesidade dun novo libro para poder continua-las anotacións.

Ler máis Ler menos

A onde acudir

CONSELLERÍA DO MAR

SECRETARÍA XERAL TÉCNICA

Órgano responsable

SECRETARÍA XERAL TÉCNICA

Normativa

Ámbito Autonómico

Lei 7/1992, do 24 de xullo, de pesca fluvial (DOG nº 151 do 5 de agosto de 1992).

Ligazón á normativa

Decreto 130/1997, do 14 de maio, polo que se aproba o Regulamento de ordenación da pesca fluvial e dos ecosistemas acuáticos continentais (DOG nº 106 do 4 de xuño de 1997).

Ligazón á normativa

Orde do 25 de outubro de 1999 pola que se regula o funcionamento dos centros de acuicultura en augas continentais e o seu rexistro (DOG nº 212 do 3 de novembro de 1999).

Ligazón á normativa

Decreto 46/2012, do 19 de xaneiro, polo que se establece a estrutura orgánica da Consellería do Medio Rural e do Mar, e do Fondo Galego de Garantía Agraria (DOG nº 16 do 24 de xaneiro de 2012).

Ligazón á normativa

Orde do 22 de abril de 2015 pola que se adaptan e incorporan á sede electrónica da Xunta de Galicia os procedementos administrativos de prazo aberto da Consellería do Medio Rural e do Mar (DOG nº 77 do 24 de abril de 2015).

Ligazón á normativa

Ler máis Ler menos