IN201F - Subvencións as asociacións profesionais de artesáns cuxo ámbito de actuación se desenvolva na Comunidade Autónoma de Galicia, para o fomento do sector artesanal galego.

Obxecto

As subvencións reguladas por estas bases teñen por obxecto o fomento do sector artesanal na Comunidade Autónoma de Galicia, a través do apoio ás asociacións profesionais e empresariais do sector.

En concreto, considéranse actuacións subvencionables as que a continuación se especifican, desenvolvidas por asociacións profesionais e empresariais de artesáns e artesás cuxo ámbito de actuación se desenvolva na Comunidade Autónoma de Galicia.

a) Investimentos en equipamento, mellora da loxística e das comunicacións.

I. Adquisición de equipamentos para procesos de informatización, que deberán ser, en todo caso, de primeiro uso, cun máximo dunha unidade por entidade solicitante.

II. Creación de redes de comunicación que posibiliten a interconexión en rede das asociacións profesionais e empresariais entre si ou cos seus artesáns e artesás, así como con outros organismos ou centros de xestión directamente relacionados co sector da distribución comercial, e que fomenten o labor de asesoramento e a posta en funcionamento de plataformas que faciliten o comercio.

III. Proxectos de creación e consolidación de agrupacións e central de compras e servizos, estudos previos sobre a súa viabilidade e a súa posta en funcionamento, e plans de accións realizados por empresas especializadas.


b) Divulgación e promoción de produtos artesanais:
I. Realización de catálogos ou outro tipo de soporte publicitario, incluídos rótulos e valos publicitarios, en papel, magnéticos ou CD/DVD, a edición de material impreso e audiovisual sobre produción artesanal especificamente dirixidos e concibidos ao fomento da actividade e á potenciación dos produtos artesanais.

II. Deseño, creación e contratación de dominio para páxina web.

c) Participación como expositor con caseta propia en feiras de carácter profesional.

I. Gastos que ocasionen os espazos que se contraten, alugamento ou construción da caseta e transporte do material, montaxe e desmontaxe das casetas, seguros, enerxía eléctrica e vixilancia. Contratación de persoal de atención ao público, de intérpretes, gastos de desprazamento en transporte público colectivo e aloxamento de ata dúas persoas, así como publicidade e publicacións editadas ex profeso para a participación directa nestes eventos.

II. Adquisición de elementos ou mobiliario básicos que formen parte do deseño dun expositor para a súa utilización exclusiva en feiras profesionais.

d) Incorporación do deseño ás novas liñas de produto, mediante a colaboración con axentes externos profesionais que desenvolvan a dita actividade a título principal.

I. Os honorarios dos consultores de deseño así como os custos relativos aos materiais necesarios para plasmar en prototipos os deseños froito da colaboración.

e) Actuacións específicas realizadas polas asociacións profesionais e empresariais de artesáns e artesás tales como: actividades de información e orientación comercial, organización de conferencias, xornadas técnicas, mesas redondas, orientadas e deseñadas en liña coas características e especificidades do sector artesanal e encamiñadas ao fomento e desenvolvemento deste.

Ler máis Ler menos

A quen vai dirixido?

As asociacións profesionais ou empresariais de artesáns/ás

Requisitos

-Acreditar a inscrición dun mínimo de dez artesáns/ás no Rexistro Xeral de Artesanía de Galicia.
-Ámbito de actuación se desenvolva integramente na Comunidade Autónoma de Galicia.
-Non poderán obter a condición de beneficiarios/as aqueles/as solicitantes nos cales concorra algunha das circunstancias previstas no artigo 10 da Lei 9/2007.
-As entidades beneficiarias non poderán ter a consideración de empresa en crise conforme o disposto no artigo 1º alínea h) do Regulamento (CE) 1998/2006, do 15 de decembro, relativo á aplicación dos artigos 87º e 88º do Tratado ás axudas de minimis.

A onde acudir

CONSELLERÍA DE ECONOMÍA, EMPREGO E INDUSTRIA

Dirección Xeral de Comercio e Consumo

SUBDIRECCIÓN XERAL DE COMERCIO

Órgano responsable

SUBDIRECCIÓN XERAL DE COMERCIO

Normativa

Ámbito Autonómico

Orde do 10 de marzo de 2011 pola que se aproban as bases reguladoras para a concesión, en réxime de concorrencia competitiva, das subvencións ás asociacións profesionais e empresariais de artesáns e artesás cuxo ámbito de actuación se desenvolva na Comunidade Autónoma de Galicia, para o fomento do sector artesanal galego, e se procede á súa convocatoria para o ano 2011. Código de procedemento IN201F, presentación telemática (DOG nº 61 do 28 de marzo de 2011).

Ligazón á normativa