Celebración dos Actos de Vodas Civís no Edificio Municipal (r/ Areal, 46), Pazo-Museo Quiñones de León e Casa do Concello de Vigo

Os casamentos civís no Concello de Vigo celebraranse, sempre e cando estean dispoñibles, nos seguintes lugares, días e horas:

- Edificio municipal, r/ Areal, 46: venres que non sexan festivos, 13.00, 13.30 horas.

- Pazo-Museo "Quiñones de León" (Avda. Castrelos, s/n): Venres, que non sexan festivos ás 18.30 e 19.00 horas e sábados, que non sexan festivos nin víspera de festivo, ás 12.00, 12.30 e 13.00 - 18.30 e 19.00 horas.

- Casa do Concello: Celebraranse neste lugar sempre que sexa por causas xustificadas ou de necesidade.

A quen está dirixido

- Calquera persoa maior de idade.

- Os menores de 14 a 16 anos deberán obter previamente o permiso do Rexistro Civil.

- Os menores de 16 a 18 anos poderán ser emancipados por concesión dos seus pais ou dos que ostenten a patria potestade, e feita a emancipación solicitarán certificación literal de nacemento con inscrición marxinal da mencionada emancipación.

Como facelo

NOTA: Pode consultar os solicitantes obrigados a relacionarse coa administración de maneira electrónica.

Presencialmente

Os interesados deben tramitar, previa ou conxuntamente á solicitude presentada no Concello, o correspondente expediente matrimonial no Rexistro Civil. Este tramitarase, de viviren os dous contraentes en Vigo, no Rexistro Civil do Xulgado de 1ª Instancia nº 4 (rúa Lalín, 4, tfno: 986817512). De viviren fóra de Vigo, xestionarase no Rexistro Civil que corresponda.

Unha vez o xuez encargado do Rexistro Civil dicte resolución do mencionado expediente, entregarase no Rexistro Xeral do Concello de Vigo, indicando a data e a hora de celebración de matrimonio, a seguinte documentación:

- Escrito de datos de contraentes e Boletín estatístico de matrimonio, que se facilita no Rexistro Civil correspondente.

- Fotocopia do DNI das dúas testemuñas do casamento, maiores de idade, que intervirán na celebración do acto.

A citada documentación é preceptiva, debendo ser presentada no Concello no período de tempo comprendido entre o momento de presentación da solicitude e o día décimo anterior a data de celebración da voda civil.

No departamento de Información do Concello, facilitarase o impreso de solicitude (tamén disponíbel nesta páxina) que entregarase, unha vez cuberto, no Rexistro Xeral do Concello para o seu envío ao Departamento de Protocolo.

Documentación requirida

Escrito de datos de contraentes
Que se facilita no Rexistro Civil correspondente.

DNI
Fotocopia do DNI das dúas testemuñas do casamento, maiores de idade, que intervirán na celebración do acto.

Solicitude de Vodas Civís no Edificio Municipal (r/ Areal, 46), Pazo-Museo Quiñones de León e Casa do Concello de Vigo (2 copias)

Observacións

- No caso de tramitar conxuntamente o expediente de matrimonio civil no Rexistro Civil e a solicitude a presentar no Concello, debe ter en conta para solicitar data, que a duración do trámite do expediente de matrimonio no Rexistro Civil é, como mínimo, de tres meses, dependendo do estado civil e nacionalidade dos solicitantes.

- Por razóns de dispoñibilidade do Pazo-Museo Quiñones de León e da sala da planta novena do Concello de Vigo, soamente admitiranse solicitudes de datas relativas ó ano en curso.

- O prazo para admisión de solicitudes de vodas civís correspondentes ao ano seguinte, abrirase sempre, no mes de xuño do ano anterior.

- Se por causas de forza maior ou de interese xeral da propia administración, como celebración de recepcións ou outro tipo de actos ineludibles, se necesitasen as dependencias do citado pazo, a celebración do acto de casamento realizaríase a determinar polo Alcalde, dando conta ás persoas interesadas.

Notificación:

O Departamento de Protocolo informaralles aos/ás solicitantes telefonicamente da dispoñibilidade de datas no prazo de 10 días, dende a recepción da solicitude.

A adxudicación de datas e horas será por orde rigoroso de entrada das solicitude no Rexistro Xeral do Concello ou Rexistro electrónico.

Competencia para Celebración de Voda Civil:

As vodas civís serán celebradas polo alcalde ou concelleiro/a en quen delegue. De tódolos xeitos, os solicitantes poderán suxerir un/unha concelleiro/a determinado/a, para o que deberán indicar o nome e apelidos do concelleiro/a no impreso de solicitude.

Outros Servizos:

O Concello de Vigo faise cargo do acondicionamento da sala onde se celebrará o matrimonio civil, así como de:

-Ambientación musical; Canon de Johann Pachelbel. No caso de preferir outra peza musical, entragarase seleccionada e gravada (soporte cd) no Departamento de Relacións Públicas, unha semana antes da celebración do matrimonio civil; dito cd devolverase ao remate da cerimonia.

-Ornamentación floral.

-Obsequio aos contraentes ao remate da cerimonia.

O Concello non se ocupará de reportaxes fotográficas ou filmes.

Todos os servicios anteriores son gratuítos.

Advertencias:

Prohíbese o lanzamento de arroz, pétalos ou calquera outro material dentro das salas nas que se celebren as vodas civís; ditas accións reservaranse para fóra do edificio do Concello ou da porta de acceso ó Pazo-Museo Quiñones de León.

Prohíbese a entrada e estacionamento de vehículos dentro do Xardín Histórico e do Pazo-Museo Quiñones de León, declarados Ben de Interese Cultural, e a entrada e estacionamento de vehículos no garaxe do edificio do Concello de Vigo.

Deberase facer un bo uso do Xardín Histórico; respectaranse escrupulosamente en todo momento os macizos e plantacións existentes.

Departamento Responsable:

O Departamento de Protocolo é o responsable do trámite e celebración dos actos de casamentos civís. Dende este departamento remitarase a acta de matrimonio asinada ó Rexistro Civil de Vigo, para que nun prazo de tres semanas, seguintes ó día da voda civil, o Xulgado facilite ás persoas interesadas o correspondente Libro de Familia.

Para máis información deberán contactar cos seguintes servicios:

Para información inicial:

Departamento Atención Cidadá

Tfnos:010, chamadas dende Vigo. 986810260, chamadas dende fóra de Vigo ou dende móbil.

Correo electrónico: 010@vigo.org

No caso de teren xa solicitada data de celebración de matrimonio:

Departamento de Protocolo

Tfno: 986 810 156; Correo electrónico: ofi.protocolo@vigo.org